المادي .. و المثالية

- حتعمل إيه لو جيتلك بكرة حالقة جناب شعري و صبغاه أخضر؟!

- .................... !!!!

- لأ بجد؟ حتعمل إيه؟

- ولا حاجة .. بعد ما أفوق من الخضة ححاول أطمن نفسي و أقول مش مهم ..!!

- بجد؟

- بصي .. طول ما كل حاجة فيكي في مكانها .. يبقى اصبغي شعرك أخضر براحتك .. بس لازم حكاية تحلقي كابوريا دي؟

- أنا كنت عاملة كدة قبل ما آجي مصر بفترة .. كان شكلي يجنن .. ماما عيطت أول ما شافتني عاملة كدة !

- انتي مجنونة .. صح؟

- طبعا ً .. مش عرفتك؟

- إحم .. و الله انتي مش أول واحدة تعرفني .. بس ولا واحدة حاولت تصبغ شعرها أخضر بسببي !!

- و بعدين إيه طول ما كل حاجة فيكي في مكانها دي؟ قصدك إيه بالظبت؟

- قصدي إن كان على اللعب في الشعر بس .. بسيطة .. في حاجات تانية لا يستحب اللعب فيها !

- أفهم من كدة إنك بتحبني عشان شكلي و جسمي ؟

- أولا ً أنا ما قلتش إني بحبك ! ثانيا ً طبعا ً الشكل و الجسم مهمين جدا ً .. آه بحترم عقلك .. و بتعجبني طريقة تفكيرك بغض النظر عن موضوع الشعر الأخضر ده .. بس حيبقي الفرق بينك و بين أي واحد صاحبي إيه لو جسمك خشن و عندك شعر في وشك ؟ ححتاجلك ليه؟ عشان نقعد نتكلم بس؟ طيب و لما نخلص كلام؟

- أول مرة آخد بالي إن الجنس واخد مساحة مهمة من تفكيرك !

- مساحة إيه ؟! هو المطلوب مني إني أزهد في الحياة تماما ً و أبقى فيلسوف و متكلم جيد طول الوقت و ما أفكرش فيكي غيرو أفتكر مناقشاتنا في الدين و بس عشان ما يبقاش الجنس واخد مساحة من تفكيري؟

- لأ بس يعني .. مستغرباك بس !! بس مش زعلانة ولا حاجة لا تفهمني غلط !

- لأ مهو ناقص تبقي زعلتي .. بقولك إيه .. انتي عجباني حتة واحدة كدة .. مش حعرف أقسمك كذا منطقة .. عشان تبقى فيه منطقة العقل و منطقة الأنوثة و منطقة الجسم و منطقة الجنس مثلا ً يعني .. بالنسبالي كل الحاجات دي بتصب على بعض .. منفدة على بعض .. سايحة على بعض و مطلعة البنت اللي قاعدة قدامي دلوقت !

- طيب قولي لما أسافر حتعمل إيه؟

- و أفكر ليه من دلوقت؟ أقولك ؟ مش حعمل حاجة .. حعمل مش واخد بالي ! أقولك؟ حزعل شهر بالكتير و بعدين أنسى و أكبر دماغي !

- إيه ده يعني مش بتحبني ؟!

- حد جاب سيرة الحب دلوقت؟ ما أنا لسة قايلك لأ؟ بقولك إيه .. يلا بينا !

- فين؟

- أي مكان مافيهوش بني آدمين.

- انت طلعت مادي جدا ً !!

- الله يخليكي .. مش طالب منك بس غير إنك تبقي مثالية بالظبت زي المرة اللي فاتت .. يللا.